വാർത്തയും വിപണിയും

രാത്രി പത്തുമണി കഴിഞ്ഞപ്പോൾ, മൊബൈൽ പാടാൻ തുടങ്ങി.
മുരളീധരൻ സെൽഫോൺ കാതോട് ചേർത്തു.
"മുരളിയേട്ടാ,ഇതു ഞാനാ അരുൺ.."
" ആഹാ..കുറെ നാളായല്ലോ..ഖത്തറിൽ നിന്നാണോ?"
" അതേ..അങ്ങനെ റെക്സിറ്റും ബ്രെക്സിറ്റും കഴിഞ്ഞല്ലോ..ഒന്നും മാർകെറ്റിൽ ഏശിയിട്ടില്ല.."
" അതേ..പവനായി ശവമായി.."
" കഴിഞ്ഞ ഒരു വർഷം മൊത്തം പ്രശ്നം ആയിരുന്നല്ലോ..ക്രൂഡ് ഓയിലും മെറ്റലും ഇടിയുന്നു..ഗ്രീസിന് കടക്കെണി..ചൈനയിൽ മാർക്കറ്റ് വീഴുന്നു..വ്യാവസായിക ഉത്പാദനം തകരുന്നു..ജി.എസ്.ടി നീണ്ടു പോകുന്നു.."
 " ഓഹരി വിപണിയല്ലേ..പ്രശ്നങ്ങൾ അവസാനിക്കില്ല..ലോകത്തിന്റെ ഏതെങ്കിലും ഒരു കോണിൽ ഒരു ദുഃഖം ഉണ്ടായാൽ ഒപ്പം വിഷമിക്കുന്നവർ ആണല്ലോ ഇന്ത്യൻ നിക്ഷേപകർ.ഇതിനു വാർത്ത ചാനലുകൾക്കും ന്യൂസ് വെബ്സൈറ്റുകൾക്കും നിർണായക സ്വാധീനം ഉണ്ട്.നെഗറ്റീവ് ന്യൂസിനാണ് എപ്പോഴും മുൻതൂക്കം.പക്ഷെ,നമ്മുടെ സമ്പദ്ഘടന ഏറ്റവും മികച്ച വളർച്ചാനിരക്ക് നിലനിര്ത്തുന്നത് മാത്രം പലരും ഓർക്കാറില്ല.."
" ഇനി എന്തായിരിക്കും അടുത്ത പുലിവാല്?റിസർവ് ബാങ്ക് പലിശനിരക്ക് വീണ്ടും കുറക്കുമോ?ഫെഡറൽ റിസേർവ് പലിശ നിരക്ക് കൂട്ടുമോ?എന്തായിരിക്കും ഇനി ബ്രിട്ടന്റെ അവസ്ഥ? അമേരിക്കയിലെയും യൂറോപ്പിലെയും ഗവണ്മെന്റ് ബോണ്ടുകളുടെ മൂല്യം ഇനിയും ഇടിയുമോ?"
 അരുണിന്റെ ശബ്ദത്തിൽ ആശങ്ക.
" ആലോചിക്കാൻ തുടങ്ങിയാൽ,പ്രശ്നങ്ങളുടെ പെരുമഴ ആയിരിക്കും..വാർത്തകൾ അടിസ്ഥാന കാര്യങ്ങൾക്കു മീതെ വളരുമ്പോൾ സംഭവിക്കുന്നതാണിത്."
"എന്താണ് അടിസ്ഥാന കാര്യം?"
"അരുൺ,നിങ്ങളുടെ വാർഷിക വരുമാനം ഇരുപതു ശതമാനം എങ്കിലും വര്ധിപ്പിക്കുന്നതിനെപ്പറ്റി ആലോചിക്കൂ..അനാവശ്യ ചിലവുകൾ വെട്ടികുറയ്ക്കൂ ..മിച്ചം പിടിക്കുന്ന തുകയിൽ പത്തു ശതമാനം കൂട്ടി നോക്കൂ..ദീർഘ കാലത്തേക്ക്,നല്ലൊരു സിസ്റ്റമാറ്റിക് ഇൻവെസ്റ്റ്മെന്റ് പ്ലാൻ തുടങ്ങൂ..സെക്ടറുകളെ പറ്റിയും കമ്പനികളുടെ സാമ്പത്തിക അവസ്ഥയെപ്പറ്റിയുമൊക്കെ വിശകലനം ചെയ്യാൻ ദിവസം ഒരു പതിനഞ്ചു മിനിറ്റു എങ്കിലും നീക്കി വെക്കൂ.."
" ഇതൊന്നും ഞാൻ ചെയ്തിട്ടില്ല..ന്യൂസുകളുടെ പിന്നാലെ ആയിരുന്നു.."
" സാരമില്ല.ഓരോ വാർത്തയ്ക്കും ദിവസങ്ങളുടെയോ ആഴ്ചകളുടെയോ ആയുസ്സു മാത്രമേയുള്ളൂ..ആ പ്രാധാന്യം മാത്രം അവയ്ക്കു നൽകിയാൽ മതി.."
" താങ്ക്സ് മുരളിയേട്ടാ..ഗുഡ് നൈറ്റ്.."