താൽക്കാലിക നേട്ടങ്ങൾക്കു പിന്നാലെ പോകുകയോ ,അമിത പ്രതീക്ഷകൾ മാത്രം വെച്ച് പുലർത്തുകയോ ചെയ്യുമ്പോൾ പലരും വിസ്മരിക്കുന്ന ശാസ്ത്രീയ മാർഗ്ഗങ്ങളിൽ ഒന്നാണ് സൈക്ലിക്കൽ ഇൻവെസ്റ്റിംഗ്‌. ദീർഘ കാല സ്ഥിരതയോടെ വില കയറുന്ന മൾട്ടിബാഗറുകളും,കാലങ്ങളായി ഇറങ്ങുന്ന കരടിക്കുട്ടന്മാരായ ഓഹരികളും മാത്രം ഉള്ള ഒന്നല്ല സ്റ്റോക്ക് മാർക്കറ്റ്. "ഞാൻ മൾട്ടിബാഗ്ഗർ മാത്രമേ വാങ്ങൂ' എന്ന് കൊച്ചുകുട്ടികളെ പോലെ വാശി പിടിക്കുന്നവർക്കു നിരവധി അവസരങ്ങൾ നഷ്ടപ്പെടാറുണ്ട്.കാരണം,അത്തരം ഓഹരികൾ മൊത്തം വിപണിയുടെ കേവലം അഞ്ചു ശതമാനം മാത്രമേ വരൂ.ടെക്‌നോ-ഫണ്ടമെന്റൽ ആയ ഘടകങ്ങൾ തീർത്തും അവഗണിച്ചുകൊണ്ട് വാങ്ങിക്കൂട്ടുന്നവർക്കും നിരാശ മാത്രമേ ഉണ്ടാകുകയുള്ളൂ താനും.
തങ്ങളുടെ തന്ത്രങ്ങളോടൊപ്പം അഗ്രസ്സീവ് ആയ ആർക്കും ചേർത്തുവെയ്ക്കാവുന്ന ഒന്നാണ് സൈക്ക്ളിക്കൽ ഇൻവെസ്റ്റിംഗ്‌.ഇത് മനസ്സിലാക്കാനുള്ള ഏറ്റവും നല്ല മാർഗ്ഗം ഓഹരിയുടെ ദീർഘ കാല ഗ്രാഫ് പരിശോധിക്കുകയാണ്‌.ആൾ ടൈം ഡാറ്റ നോക്കിയാൽ ഗതി മനസ്സിലാകും.കഴിഞ്ഞ അഞ്ചോ പത്തോ വർഷത്തെ മൂവ്മെന്റ് നോക്കിയാൽ,ഇത്തരം ഓഹരികളിൽ എൻട്രി നടത്താനും എക്സിറ്റ് ചെയ്യാനുമുള്ള ലെവലുകൾ കണ്ടെത്താൻ കഴിയും.പലതും സ്ഥിരമായ മേജർ സപ്പോർട്ടിനും,റെസിസ്റ്റൻസിനുമിടയിൽ ചാടി കളിക്കാറുണ്ട്.കമ്പനിയുടെ ബിസിനസ് ഏറെക്കുറെ ഒരേ രീതിയിൽ തന്നെ നില കൊള്ളുമ്പോഴോ,ഭാവി പ്രതീക്ഷകൾ കുറഞ്ഞു നിൽക്കുമ്പോഴോ ആണ് ഇങ്ങനെയുള്ള ചാഞ്ചാട്ടം ഉണ്ടാകുന്നത്.മികച്ച ബ്രാൻഡ് ആണെങ്കിൽ പോലും,കട ബാധ്യത കൂടുതൽ ആണെങ്കിലും ഇങ്ങനെ സംഭവിക്കാം.ദിവസ വ്യാപാരത്തിലെയും,സ്വിങ്ങ് ട്രേഡിങ്ങിലെയും ചാഞ്ചാട്ടത്തെ വോളറ്റിലിറ്റിയെന്നും,ഹൃസ്വകാലത്തിലോ മധ്യ കാലയളവിലോ ഉള്ള ചാഞ്ചാട്ടത്തെ റേഞ്ചു ബൗണ്ട് എന്നും വിളിക്കുന്നു.
ഫണ്ടമെന്റലിസ്റ്റുകൾ നോക്കുന്നത് മറ്റൊരു തരത്തിലാണ്.ക്വാർട്ടർലി റിസൾട്ടുകൾ പ്രതീക്ഷ കാക്കാതെ വരുമ്പോഴും ഭാവിയിലെ വളർച്ചാ പ്രതീക്ഷകൾ കുറയുമ്പോഴും അവർ അത്തരം ഓഹരികൾ കുറയ്ക്കുകയോ,ഒഴിവാക്കുകയോ ചെയ്യുന്നു.സമ്പദ് ഘടനയിലെ വളർച്ചാനിരക്ക് ശക്തിപ്പെടുമ്പോൾ,അഭിവൃദ്ധിപ്പെടുന്ന സെക്ടറുകൾ ആണ് സൈക്ക്ളിക്കൽ സെക്ടറുകൾ. റിയാൽറ്റി സൂചികയിൽ കഴിഞ്ഞ അഞ്ചര വർഷത്തിൽ ഉണ്ടായ ചാഞ്ചാട്ടം ,സെക്ടറിലെ പല ഓഹരികളെയും സമാനമായ രീതിയിൽ ചലിപ്പിച്ചതായി കാണാൻ കഴിയും.
കഴിഞ്ഞ ദശകത്തിൽ ഇൻഫ്രാ മേഖലയിൽ നില നിന്ന മന്ദതയും, വലിയ പ്രോജക്ടുകളുടെ ക്ലിയറൻസിനുണ്ടായ കാല താമസവും,മാർക്കറ്റ് സെന്റിമെന്റുമൊക്കെ ഇതിനെ സ്വാധീനിച്ചിട്ടുണ്ട്.
മേജർ സപ്പോർട്ടിന് വാങ്ങുകയും മേജർ റെസിസ്റ്റൻസിനു വിൽക്കുകയും ചെയ്യുക എന്ന തന്ത്രം ആണ് സൈക്ക്ളിക്കൽ മൂവ് നടത്തുന്ന ഓഹരികളിൽ ഫലപ്രദമായിട്ടുള്ളത്.കുറഞ്ഞ കാലയളവിലെ ട്രേഡിങ് ചാർട്ടുകൾ മാത്രം പരിശോധിച്ചാൽ ഇവയുടെ ഗതി മനസ്സിലാകണമെന്നില്ല.അഞ്ചു വർഷ കാലയളവിനു മുകളിൽ ഉള്ള വീക്കിലി,മന്ത്‌ലി ചാർട്ടുകളിൽ നോക്കിയാൽ മാത്രമേ വലിയ വ്യതിയാനങ്ങൾ പരിശോധിക്കാനും,ഉപയോഗിക്കാനും കഴിയുകയുള്ളൂ.
----------------------------------------------------------------------------------------------
ഡിസ്ക്ലെയിമർ: ഓഹരി വിപണി ഉയർന്ന റിസ്കിനു വിധേയമാണ് .നിക്ഷേപ തീരുമാനങ്ങൾക്ക് വിശദമായ സ്വയം വിലയിരുത്തലോ ,നിങ്ങളുടെ ഉപദേശകന്റെ സേവനമോ ഉപയോഗിച്ച് മാത്രം ചെയ്യുക.