ഇരട്ടിക്കുന്ന നിക്ഷേപം: ഒരു സമീപ കാല വിശകലനം

                   

               
   
        എന്താണ് ഒരു സാധാരണ നിക്ഷേപകന് ഏറ്റവും അനുയോജ്യമായ തന്ത്രം ? നിക്ഷേപത്തിന്റെ സുരക്ഷിതത്വം നിലനിറുത്തികൊണ്ട് തന്നെ സ്ഥിരമായി ലാഭം കൈവരിക്കലാണ് ഏറ്റവും നല്ലത്.എന്നാൽ,ലാഭത്തിനായുള്ള പരക്കം പാച്ചലിൽ,സുരക്ഷിതത്വം നന്നേ വിസ്മരിക്കുന്നവരുണ്ട്.ഊഹാപോഹങ്ങളുടെയും വാർത്തകളുടെയും അടിസ്ഥാനത്തിലാണ് പലപ്പോഴും ഇത് സംഭവിക്കുന്നത്‌.
     എന്നാൽ, മികച്ച സാമ്പത്തിക അടിത്തറയും,വളർച്ചാ നിരക്കും,കടത്തിന്റെ അഭാവവും കൊണ്ടു ശക്തമായി നിലനില്ക്കുന്ന കമ്പനികൾക്ക്  വിപണിയിൽ മെച്ചപ്പെട്ട പ്രകടനം നല്കാൻ കഴിഞ്ഞിട്ടുണ്ട്.ചില ഓഹരികൾ ഇവിടെപരിശോധിക്കുകയാണ്.

   2012 ൽ നൂറു രൂപ വില ഉണ്ടായിരുന്ന അജന്താ ഫാർമ 2014 അവസാനത്തോടെ 1700 വരെയെത്തി.രണ്ടായിരത്തി പതിനഞ്ചിലെ വിപണി ഇടിവിൽ 35 ശതമാനം താഴേക്കു പോയെങ്കിലും ഈ വര്ഷം മികച്ച തിരിച്ചു വരവാണ് കാണിക്കുന്നത്.ഒരു ദശകമായി അറ്റ ലാഭത്തിൽ  മുപ്പതു ശതമാനത്തോളം  വർദ്ധനവുണ്ടായിരുന്ന കമ്പനിക്ക് അതിശയകരമായ ബിസിനസ് പുരോഗതിയാണ് 2012 നു ശേഷം ഉണ്ടായത്.രാജ്യത്തെ ഗവന്മെന്റ് സ്ഥാപനങ്ങള്ക്ക് മരുന്ന് വിൽക്കുന്നതിൽ നിന്നും ഏഷ്യയിലും ആഫ്രിക്കയിലും  അമേരിക്കയിലും ഉൾപ്പെടെ   സ്പെഷ്യാലിറ്റി ജെനെറിക് മരുന്നുകളുടെ മേഖലയിലേക്ക് നീങ്ങിയതാണ് അനുഗ്രഹമായത്.

    2010 ൽ 35 രൂപ വില ഉണ്ടായിരുന്ന ബെർജർ പെയിന്റ്സ് എട്ടു മടങ്ങാണ് ഇതിനോടകം വിലയിൽ മുന്നേറിയത്.ഇടയ്ക്കിടെ പതിനഞ്ചു മുതൽ ഇരുപതു ശതമാനം വിലയിടിവും ഉണ്ടാകുമായിരുന്നു.പെയിൻറ് മേഖലയിലെ അനന്ത സാധ്യതകളെ  വളരുന്ന ഡീലർ നെറ്റുവർക്കും പുതിയതരം എമൽഷൻ പെയിന്റുകളുടെ ബ്രാന്റിങ്ങും വഴി ഉപയോഗിക്കാൻ കഴിഞ്ഞതാണ് നേട്ടമായത്.
ഇതേ കാലയളവിൽ അപ്പോളോ ഹോസ്പിറ്റലിന്റെ ഓഹരിവില ഏഴു മടങ്ങാണ് വർധിച്ചത്.ആരോഗ്യ രംഗത്തെ മികവുറ്റ സ്ഥാപനമായി നില നില്ക്കുന്നതാണ് കാരണമായത്.മികച്ച ബാലന്സ് ഷീറ്റും സാമ്പത്തിക സുസ്ഥിരതയും നിക്ഷേപകരുടെ വിശ്വാസം ആർജിക്കാൻ തുണയായി.

           ലാഭക്ഷമതയിലെ  സ്ഥിരതയും മുന്നേറ്റവുമാണ് ഇൻഡസ്  ഇന്ഡ് ബാങ്കിന്റെ വില ഒരു ദശകം കൊണ്ട് ഇരുപതു മടങ്ങ്‌ ഉയരാൻ കാരണമായത്‌.ഡിപോസിട്ടും ലോൺ ബുക്കും ഏറെ ഉയർന്നിട്ടും, വളരെ കുറഞ്ഞ നിഷ്ക്രീയ ആസ്തികൾ മാത്രം ഉള്ളതാണ് പ്രത്യേകത.
     മേൽ  പറഞ്ഞ കമ്പനികൾ നിക്ഷേപകന് ആദായം നല്കിയത് മികച്ച മാനേജുമെന്റും സാമ്പത്തിക അച്ചടക്കവും പുലർത്തിയതിനൊപ്പം ബിസിനസ്സിൽ  ശ്രദ്ധേയവും  നൂതനവുമായ  തന്ത്രങ്ങൾ ആവിഷ്കരിച്ചത് കൊണ്ട് കൂടിയാണ്.ദീർഘ കാല ഓഹരികൾ തിരഞ്ഞെടുക്കുമ്പോൾ,കമ്പനികളുടെ ലാഭ ക്ഷമത,സവിശേഷമായ ബിസിനസ് രീതികൾ എന്നിവ കൂടി  നിക്ഷേപകൻ ശ്രദ്ധിക്കേണ്ടതുണ്ട്.

Disclaimer:ഇത് പഠനത്തിനു വേണ്ടിയുള്ള വിശകലനം മാത്രമാണ്.
നിക്ഷേപക ഉപദേശം അല്ല.
നിക്ഷേപ തീരുമാനത്തിന് മുന്പ്,നിങ്ങളുടെ സാമ്പത്തിക ഉപദേശകന്റെ സേവനം തേടുക.
Image courtesy: chartink.