ഈ പുസ്തകങ്ങൾ എനിക്ക് വ്യക്തിപരമായി ഏറെ ഗുണം ചെയ്തിട്ടുണ്ട്.അതുകൊണ്ടു തന്നെ,നിങ്ങൾക്കും അത് ഗുണകരമാകുമെന്നു ഞാൻ കരുതുന്നു.
കിയോസാക്കിയുടെ തത്വങ്ങളുടെ സാരാംശം എങ്ങനെ നിങ്ങളുടെ ജീവിതത്തിൽ ലളിതമായി നടപ്പാക്കാൻ കഴിയും?
1.നിങ്ങളുടെ സാമ്പത്തിക ജ്ഞാനം വർധിപ്പിക്കുക.സാമ്പത്തിക മാസികകൾ,പത്രങ്ങൾ,പുസ്തകങ്ങൾ എന്നിവ വായിക്കുക.സാധാരണക്കാർക്ക് അപ്രാപ്യമായ ഇക്കണോമിക്സ്,കൊമേഴ്‌സ് പദങ്ങൾ മനസ്സിലാക്കുക.എങ്കിൽ മാത്രമേ,നവ ലോക വ്യവസ്ഥിതിയിൽ,നിക്ഷേപങ്ങളും വ്യാപാരവും എങ്ങനെ വിജയിക്കുന്നുവെന്നു നിങ്ങള്ക്ക് അറിയാൻ കഴിയൂ.
2.പലിശ ഭാരം വർധിപ്പിക്കുന്ന ലോണുകൾ ഒഴിവാക്കുക.ലോണുകൾ നിങ്ങളുടെ തുകയ്ക്ക് വർദ്ധനവ് ഉണ്ടാക്കുന്നില്ല.നിങ്ങളുടെ പണം വളരെ മെല്ലെ കാർന്നു തിന്നുന്ന ഉപാധിയാണ് അവ.പകരം,ആസ്തികളിൽ നിക്ഷേപിക്കുക.ബോണ്ടുകൾ,ഓഹരികൾ,മ്യൂച്വൽ ഫണ്ടുകൾ,പ്രോപ്പർട്ടി,സ്വർണ്ണം എന്നിവയാണ് ആസ്തികൾ ആയി കണക്കാക്കപ്പെടുന്നത്.നിങ്ങളുടെ തുക വർധിപ്പിക്കാൻ കരുത്തുള്ള എന്തും ആസ്തിയാണ്.ആസ്തികൾ കടങ്ങളെക്കാൾ കൂട്ടിക്കൊണ്ടു വരാൻ കഴിയണം. ആസ്തിയിൽ നിന്നും ഉള്ള വരുമാനം നിങ്ങളുടെ എല്ലാ ചെലവുകളെയും ലക്ഷ്യങ്ങളെയും നേരിടാൻ ഉതകുന്ന അവസ്ഥയാണ് ലക്ഷ്യം ഇടേണ്ടത്.
3.കൂടുതൽ ആളുകളും സുരക്ഷിതത്വം നോക്കുന്നവർ ആണ്.ഇത്,അവസരങ്ങളെ തിരിച്ചറിയുന്നതിൽ നിന്ന് അവരെ വിലക്കുന്നു.പത്തു ശതമാനം ആളുകളാണ് ലോക സമ്പത്തിന്റെ തൊണ്ണൂറു ശതമാനം കൈവശം വെക്കുന്നത്.റിസ്ക് എടുക്കാതെ ആ പത്തു ശതമാനത്തിൽ ഉൾപ്പെടാനാവില്ല.അതായതു,മുൻപിൽ ഉള്ള അവസരങ്ങൾ ഉപയോഗിക്കാനുള്ള കഴിവ് നേടാൻ കഴിയണം.
4.നിക്ഷേപകൻ എന്ന് സ്വയം വിചാരിക്കുന്നവരിൽ ഏറിയ പങ്കും ഊഹ കച്ചവടക്കാരോ,ഹൃസ്വ കാല വ്യാപരികളോ ആണ്.ഇന്ന് പണം ഇറക്കി രണ്ടു വർഷം കഴിയും മുൻപ് ഫലം എടുത്തു മേഖലകൾ മാറിക്കൊണ്ടിരുന്നാൽ,നിക്ഷേപകന് ആകാൻ കഴിയില്ല.നിങ്ങൾ ഏതു വിഭാഗത്തിലാണ്?സ്വയം മനസിലാക്കുക.
5.ആദ്യം ഒരു പ്ലാൻ ഉണ്ടാക്കുക.ദീർഘ കാലത്തേക്ക് സമ്പത്തു സൃഷ്ടിക്കാൻ വേണ്ടിയുള്ള ഒരു പദ്ധതി ആയിരിക്കണം അത്.നിങ്ങളുടെ കഴിവുകൾ എങ്ങനെ ഫലപ്രദമായി ഉപയോഗിക്കാം എന്ന് ആ പദ്ധതിയിൽ ഉണ്ടാകണം.അതോടൊപ്പം,ആസ്തികലും വരുമാനവും സൃഷ്ടിക്കാൻ ആവശ്യമായ അറിവുകളും കഴിവുകളും ഓരോന്നായി നേടിയെടുക്കാനും ലക്ഷ്യമിടണം.അതിനു ശേഷം നിങ്ങളുടെ ഘട്ടം ഘട്ടമായി ഉള്ള നിക്ഷേപ മാര്ഗങ്ങള് തീരുമാനിക്കുക.
6.ഒരു ബാധ്യതയെ ആസ്തിയായി കരുതുന്നത് മണ്ടത്തരം ആണ്.ഉദാഹരണമായി,കാർ ആസ്തിയാണെന്നു ചിലർ കരുതുന്നു.പത്തു ലക്ഷത്തിനു വാങ്ങിയ കാറിനു അഞ്ചു വർഷം കഴിഞ്ഞാൽ,പതിനൊന്നു ലക്ഷം കിട്ടുമോ?ഇല്ലല്ലോ.വിലയിൽ വർദ്ധനവ് തരുന്നത് മാത്രമാണ് നിങ്ങളുടെ ആസ്തി.ഓരോ വർഷവും വില കുറയുന്നത് ആസ്തി അല്ല. ഇതു മറന്നു പണം ചെലവിടുന്നവർക്ക് മൂല്യ ശോഷണം മാത്രമേ ഉണ്ടാകൂ.
7.സമയത്തിൽ നിക്ഷേപിക്കുകയാണ് ആദ്യ പടി. സാമ്പത്തിക വിദ്യാഭ്യാസമില്ലാതെയാണ് നമ്മൾ വിദ്യാഭ്യാസം പൂർത്തിയാക്കുന്നത്.അതുകൊണ്ട്, ആസ്തിയെന്തെന്നും ബാധ്യത എന്തെന്നും അറിയുക.ഓരോ ആസ്തികൾ എങ്ങനെ കൈകാര്യം ചെയ്യണമെന്നു വിശദമായി പഠിക്കുക.അതിനു വേണ്ടി ദിവസവും കുറച്ചു സമയം നീക്കിവെക്കുക.
8.നിക്ഷേപകനായി അനുഭവ സമ്പത്തു നേടാനും സാധിക്കണം.പുസ്തകം വായിച്ചു നീന്തൽ പഠിക്കാൻ കഴിയില്ല.അത് പോലെ തന്നെയാണ്,സമ്പത്തു സൃഷ്ടിക്കലും.ചെയ്തു നോക്കാതെ, വിജയിക്കാൻ കഴിയില്ല.ഭയം ഒഴിവാക്കികൊണ്ടു വ്യാപാരവും നിക്ഷേപവും ചെയ്യാൻ ശ്രമിക്കുന്നവർക്ക് മാത്രമേ വിജയിക്കാൻ കഴിയൂ.സ്വപ്നത്തോടൊപ്പം പ്രവൃത്തിയും ആവശ്യം ആണ്.
9.പണം ഇല്ലാതെ നിക്ഷേപിക്കാൻ സാധിക്കില്ല.അതുകൊണ്ട്,വരുമാന സ്രോതസ്സുകൾ കൂട്ടുവാൻ കൂടി ശ്രദ്ധിക്കുക.
ജോലിയിൽ നിന്നുള്ള വരുമാനം മാത്രമാണ് നിങ്ങൾക്കു ഉള്ളതെങ്കിൽ,അത് നഷ്ടമായാൽ നിങ്ങൾ എന്ത് ചെയ്യും?അതുകൊണ്ട്,പാസ്സീവ് ആയി വരുമാനം നേടുന്നതിന് വേണ്ട കാര്യങ്ങൾ കൂടി ചെയ്യുക.ഒരു പാർട്ട് ടൈം ബിസിനസ്സ് (ജോലിയല്ല),പോർ്ട്ട്ഫോളിയോ,വരുമാനം തരുന്ന കെട്ടിടങ്ങൾ,ബിസിനസ് ഓണർഷിപ് എന്നിവ ഇതിനുള്ള മാർഗ്ഗങ്ങള് ആണ്.
10.കൂടുതലായി ബാങ്കിൽ നിന്നും ലോണുകൾ കിട്ടുമ്പോൾ,നിങ്ങളുടെ ബാധ്യത കൂടുന്നു.ബാങ്കിന്റെ ആസ്തിയും കൂടുന്നു.ക്രെഡിറ്റ് കാർഡിന് അടിമപ്പെടുമ്പോൾ,ബാങ്ക് നിങ്ങളുടെ ഇന്നത്തെ വരുമാനം നാളെയുടെ ബാധ്യതയാക്കാൻ പ്രേരിപ്പിക്കുന്നു.സത്യത്തിൽ,ലോണുകൾ ബാങ്കിന് ആസ്തിയും വരുമാനവുമായി മാറുന്നു.ഇത് മനസ്സിലാക്കാത്തവർക്കു പലിശ ചെലവുകളിൽ നിന്ന് വരുമാന സമ്പാദനത്തിലേക്കു ചുവടു വെയ്ക്കാൻ കഴിയില്ല.
അഭിപ്രായങ്ങള്‍
ഒരു അഭിപ്രായം പോസ്റ്റ് ചെയ്യൂ