വിപണിയുടെ പൊതു വികാരം

             
  രണ്ടായിരത്തി ആറിലാണ്.ടെക് മഹീന്ദ്രയുടെ ഓഹരി ലിസ്റ് ചെയ്ത ദിവസം.ഞാനും സഹപ്രവർത്തകനായ ഡീലറും കൂടി ടെർമിനലിന് മുൻപിൽ കണ്ണും നട്ടിരിക്കുകയാണ്. 365 നു പബ്ലിക് ഓഫർ നടത്തിയ ഓഹരി 560 രൂപയിലേക്കു കുതിക്കുന്നു.ലിസ്റ്റിംഗ് ദിനം തന്നെ  അമ്പത്തിമൂന്നു ശതമാനം ലാഭം!
സംഗതി കൊള്ളാമല്ലോ.വിട്ടുമാറാത്ത അമ്പരപ്പോടെയാണ് ഞങ്ങൾ അന്ന്  പിരിഞ്ഞത്.ഇങ്ങനെയും ഓഹരികൾ കുതിക്കുമോ,ഒറ്റ ദിവസം കൊണ്ട്?ആറു മാസം കൊണ്ടു,മൂന്നു മടങ്ങു വർധനവുണ്ടാകുന്നതാണ് പിന്നീട് കണ്ടത്.
" ഭയങ്കര ഫണ്ടമെന്റലാണ്..ഇതിനെ പിടിച്ചാ  കിട്ടൂല്ലാ " ബ്രാഞ്ച് മാനേജർ അന്ന് പറഞ്ഞത് ഓർമയുണ്ട്.
ഈ ഫണ്ടമെന്റല് അസാമാന്യ സംഭവം തന്നെ.തലയും കുത്തി ഇരുന്നാണേലും പഠിച്ചിട്ടു  തന്നെ ബാക്കി കാര്യം.കിട്ടുന്ന വരുമാനത്തിൽ ഭേദപ്പെട്ട തുക ഞാൻ ഓഹരി പ്രസിദ്ധീകരണങ്ങൾക്കും പുസ്തകങ്ങൾക്കും ഒക്കെയായി ചിലവഴിച്ചു വരികയാണ്.സാധിക്കുന്ന ട്രെയിനിങ്ങുകളൊക്കെ പങ്കെടുക്കാൻ പോകും.
"ഈ കൊച്ചു ചെറുക്കന് ഗള്ഫിലെങ്ങാനും പൊയ്ക്കൂടേ?"ആരോ ചോദിച്ചു.
"ഈ ജോലി തന്നെ വലിയ സന്തോഷം.." ഞാൻ പറഞ്ഞു.
അങ്ങനെയിരിക്കെ, എന്നെ ഞെട്ടിച്ചുകൊണ്ട് ടെക് മഹീന്ദ്രയുടെ വീഴ്ച തുടങ്ങി.നമ്മുടെ മൾട്ടിബാഗ്ഗർ അന്നത്തെ ഇന്ത്യൻ റോക്കറ്റു പോലെ മൂക്കും കുത്തി വീഴുന്നു.2008 ലെ  ആഗോള മാന്ദ്യത്തിൽ,ആ ഓഹരിയിൽ തുടങ്ങിയ വിലയ്ക്കു താഴേക്കുള്ള പതനമാണ് പിന്നെ കണ്ടത്..

     അന്നുണ്ടായിരുന്ന വിപണിയിലെ സുഹൃത്തുക്കൾ ഓരോരുത്തരായി 'ഗുഡ് ബൈ' പറഞ്ഞു ഗൾഫിലേക്ക് പോയി. ഓഹരി വിപണന കേന്ദ്രത്തിലെ പഴയ ഇടപാടുകാരെയൊക്കെ മഷിയിട്ടു നോക്കിയാലും കാണാതായി.'ഈച്ചയാട്ടി ഇരിക്കുക' എന്ന പ്രയോഗം  ഏറെക്കുറെ അന്വർത്ഥമാകുന്ന സമയം.
ടെക് മഹീന്ദ്രയുടെ  വില തകർച്ച
 പോട്ടെന്നു വെയ്ക്കാം.സെൻസെക്‌സിന്റെ കാര്യം ഓർത്താൽ കരച്ചിൽ വരും.ഇരുപതിനായിരത്തിൽ നിന്നു ഏഴായിരത്തി അറുനൂറ്റി തൊണ്ണൂറ്റി ഏഴിലേക്ക് തലയിടിച്ചു വീഴുന്നു.
"രണ്ടായിരം വരും.." പരിചയമുള്ള ഏറ്റവും വലിയ ട്രേഡർ പ്രവചിച്ചു.
" അപ്പോൾ,ഇനി സപ്പോർട്ട്  ഒന്നുമില്ലേ?" ഞാൻ ചോദിച്ചു.
"അതൊക്കെ എന്നേ പൊട്ടി..കുറെ കൊല്ലത്തേക്കു ഈ പണി ഇവിടെ ക്ലച്ചു പിടിക്കില്ലെന്നാണ് മോർഗൻ സ്റ്റാൻലി പറഞ്ഞിരിക്കുന്നത്..ബി.പി കൂടി തട്ടി പോകാതിരിക്കാനാ ഞാൻ തൽക്കാലം  ട്രേഡിങ് നിർത്തിയത്. "
ഡേ  ട്രേഡ് ചെയ്തു ദിവസേന  അൻപതിനായിരം രൂപ വീതം ലാഭം ഉണ്ടാക്കിയിട്ട് ആളുകൾക്ക് ബിരിയാണി വാങ്ങിച്ചു കൊടുത്തുകൊണ്ടിരുന്ന ഇക്കയാണ് പറയുന്നത്.
ഞാൻ ഗ്രഹാമിന്റെയും  ലിഞ്ചിന്റെയുമൊക്കെ ബുക്കുകൾ എടുത്തു നോക്കി.വൻവീഴ്ചയ്ക്കു മറുപടിയൊന്നും കണ്ടില്ല.കുറെ ദിവസങ്ങൾ കൂടി കഴിഞ്ഞു.
ഭാഗ്യം! ട്രേഡറുടെ  പ്രവചനം ഫലിച്ചില്ല.കാളകൾ മെല്ലെ എന്നേറ്റു നിന്നു.പിന്നെ,മെല്ലെ  ഓടാൻ തുടങ്ങി.
എല്ലാം തകർന്നു എന്നു കരുതിയിടത്തു നിന്നു ആറു മാസം കൊണ്ടു ബി.എസ്.ഇ  സൂചിക വീണ്ടും പതിനയ്യായിരം  കടന്നു.
കൊള്ളാമല്ലോ.ഇത്ര പെട്ടെന്നു   തിരിച്ചു വരുമെന്ന് കരുതിയില്ല.
ആ വിപണി വീഴ്ചയുടെ ദിനങ്ങളിലാണ് പി.ഈ .റേഷ്യോയും ഈ.പി.എസും മറ്റു കണക്കുകളും മാത്രം നോക്കിയിട്ടു കാര്യമില്ലെന്നു തീരുമാനം  എടുത്തത് .ചാർട്ടുകളുടെ ലോകത്തേക്ക് കടന്നത് അങ്ങനെയാണ്.വിപണിയുടെ പൊതുവികാരം (Market sentiment) പെട്ടെന്ന് പ്രതിഫലിക്കുന്നത് ചാർട്ടുകളിലാണ്.
ഓഹരികളിൽ ലാഭം എന്നാൽ കമ്പനിയുടെ കണക്കുകളും ലാഭക്ഷമതയും മാത്രമല്ല വിപണി വികാരം കൂടിയാണെന്ന് എന്നെ പഠിപ്പിച്ചത് 2008 ലെ സാമ്പത്തിക മാന്ദ്യവും വിപണി തകർച്ചയും ആണ്.

My memory (2008)

      വിപണിയിൽ ഇടപെടുന്ന ആളികളുടെ പൊതുവികാരം അഥവാ ആൾക്കൂട്ട മനഃശാസ്ത്രം ( Mass psychology)  ആണ് അത്.ലാഭം കിട്ടുമ്പോൾ,കുറെയൊക്കെ തിരിച്ചെടുക്കുന്നവർക്കു വൻ വീഴ്ച്ചകളിൽ   സംഭവിക്കാവുന്ന ആരോഗ്യ പ്രശ്നം ഒഴിവാക്കാം.വീഴ്ച്ച കളിൽ കുറെയൊക്കെ നിക്ഷേപിക്കാനും കഴിയേണ്ടതുണ്ട്.
കമ്പനിയുടെ കണക്കുകളും വിപണി വികാരവും ഒരുപോലെ മനസ്സിലാകുന്നവർക്കു മാത്രമേ ഷെയർ മാർക്കെറ്റിൽ നില നിൽക്കാൻ  കഴിയൂ.