മത്തായി ചേട്ടനും, ന്യൂ ഫിനാൻഷ്യൽ ഇയറും

  "എന്ത് പെട്ടെന്നാ സമയം പോകുന്നത്? പുതിയ സാമ്പത്തിക വര്ഷം തുടങ്ങി..ഈ വർഷമെങ്കിലും പ്രശ്നങ്ങളൊന്നും ഉണ്ടാവാതിരുന്നാൽ മതിയായിരുന്നു..."
" പ്രശ്നങ്ങളോ?"
"അതെ..ട്രംപും, കിങ് ജോംഗ് ഉന്നും തമ്മിലുള്ള വാക് പോര്, അമേരിക്കയും ചൈനയും തമ്മിലുള്ള ട്രേഡ് വാർ, രൂപയുടെ മൂല്യ ശോഷണം ...കോടീശ്വരന്മാർ നാട് വിടുന്നു.കടപ്പത്രങ്ങളുടെ റേറ്റിങ് താഴെ പോകുന്നു, റിയൽ എസ്റ്റേറ്റ് കച്ചവടത്തിൽ മാന്ദ്യം, ഓഹരിവിപണിയിൽ വിലയിടിവ്..എല്ലാം കൂടി കൂട്ടത്തോടെയാണല്ലോ വരവ് .."
"മോശം വാർത്തകൾ അശേഷം ഇല്ലാത്ത ഒരു സാമ്പത്തിക ലോകമാണോ മത്തായി ചേട്ടന്റെ സ്വപ്നം?"
"അങ്ങനല്ല...എന്നും പ്രശ്നങ്ങളല്ലേ...ഒന്നിനും ഒരു അനുകൂല സാഹചര്യം കിട്ടുന്നില്ല..."
" അനുകൂല സാഹചര്യം എന്ന് വെച്ചാൽ എങ്ങനെയാ?"
" ഫിക്സഡ് ഡിപ്പോസിറ്റിനു മിനിമം
പത്തു ശതമാനം പലിശ കിട്ടണം."
"ആഗോള ശരാശരി മൂന്നു മുതൽ നാല് ശതമാനമേ ഉള്ളൂ.."
"അക്കാര്യത്തിൽ ആഗോളം വേണ്ട..അത് പോലെ,ജി.എസ്.ടി എടുത്തുകളയണം...ഇൻകം ടാക്സ് ഇളവ് ഇരട്ടിയാക്കണം..ഇവന്മാർക്കൊന്നും ഒരു പ്ലാനിങ്ങും ഇല്ലന്നെ.."

"അതായത് പത്തു ശതമാനം ആളുകൾ പോലും ടാക്സ് അടയ്ക്കാത്ത ഒരു രാജ്യത്ത് ഉള്ള ടാക്സ് കൂടി മാറ്റണം എന്ന്.. അതിരിക്കട്ടെ, മത്തായി ചേട്ടൻ പ്ലാനിങ് ഒക്കെ ചെയ്യുന്നുണ്ടോ?"
" പ്ലാൻ ചെയ്യാൻ കാശ് വേണ്ടേ? ഈയിടെ ഒരു കോടിയുടെ  ഒരു ഫ്‌ളാറ്റ് കൂടി വാങ്ങി. വണ്ടി ഒന്ന് മാറ്റി.ഓഡി  എസ്.ഫൈവ്  പുതിയത് വാങ്ങി.രണ്ടിന്റേം ഇ.എം.ഐ അടയ്ക്കാൻ തന്നെ എത്ര രൂപ വേണം? ഉണ്ടായിരുന്ന രണ്ട് ഫിക്സഡ് ഡിപോസിറ്റ് പൊട്ടിച്ചിട്ടാ മൂത്ത മോനെ യു.എസ്സിൽ പഠിക്കാൻ വിട്ടത്..മോൾടെ കല്യാണസമയത്ത്, മാന്ദ്യം കാരണം സിറ്റിയിലെ സ്ഥലം വിൽക്കാൻ പറ്റിയില്ല. അറക്കവാൾ ബാങ്കിൽ ഈട് വെച്ച് കിട്ടിയ കാശിനാണ് ഫൈവ് സ്റ്റാർ ഹോട്ടലിൽ റിസപ്‌ഷൻ നടത്തിയത്. ഹണിമൂണും സ്പോൺസർ ചെയ്തു കൊടുത്തതോടെ ബാക്കി ഉണ്ടായിരുന്ന കാശും കൂടി തീർന്നു.അതിരിക്കട്ടെ, ഈ മുദ്ര ലോൺ എവിടെ കിട്ടും? അത് എടുത്തിട്ട് വേണം ഈ ഫിനാൻഷ്യൽ ഇയർ ഒന്ന് പ്ലാൻ ചെയ്യാൻ.."
" ബാങ്കിൽ തിരക്കിയാൽ മതി ചേട്ടാ.."
" സാമ്പത്തിക മാന്ദ്യം കാരണം എസ്.ഐ.പി. മൂന്നു മാസം മുടങ്ങി.കുഴപ്പം,ഇല്ലായിരിക്കും അല്ലെ ?
" എന്ത് കുഴപ്പം? മൂന്നു തവണ മുടങ്ങിയാൽ ആട്ടോ ഡെബിറ്റ് തന്നെ നിൽക്കും.."
" നന്നായി..ഹാപ്പി ന്യൂ ഫിനാൻഷ്യൽ ഇയർ. ഗോഡ് ബ്ലെസ് യൂ ."
"സെയിം ടൂ യൂ..ഇങ്ങനെ പോയാൽ ഇനി ചേട്ടനെ രക്ഷിക്കാൻ പടച്ച തമ്പുരാന്  മാത്രമേ കഴിയൂ!"